En Aquitània coma endacòm mèi, arren non resistís a la mercandizacion. La crisi globala concernís nòstres biais de viure e de produsir, e tanben nòstras representacions de l’avenir, nòstras sensibilitats, nòstres espers.

Nos cau una vertadèra refondacion per concebre diferentament nòstras relacions au tribalh, a l’economia, a la cultura.

Nosaus, ecologistas, sèm portaires d’un imaginari navèth, e de solucions navèras.

Pendent 6 ans, au despieit d’un rapòrt de fòrça desfavorable, los elegits ecologistas au Conselh Regionau d’Aquitània an sabut orientar las decisions politicas cap a mei d’ecologia.

Mès cau anar mei lonh. Majoritaris doman gràcias au recampament d’Euròpa Ecologia, nòstres elegits permetràn a nòstra region d’afrontar las escomesas ecologicas, economicas e socialas.

Volèm la reconversion ecologica de nòstra region : sostendrem totas las iniciativas creatritz d’emplecs que responden aus besonhs umans en tot respectar la qualitat de l’ambient natural e las condicions de tribalh.

La formacion professionala se diurà durbir a la qualificacion per aqueths emplecs navèths : es per exemple urgent de formar joens a l’agricultura biologica.

La pression que pesa suus tribalhaires per causa de la recèrca non rasonada de mei de rentabilitat e de productivitat se pòt pas mei susportar, tan plan dens lo privat coma dens lo public : ne tengueram compte per la causida de las ajudas publicas balhadas per la Region.

La santat es un tèma fondamental de l’ecologia. Li cau una politica publica de suenhs, mès tanben de prevencion, que passe prumèr per un ambient sanitós.

Volèm balhar una plaça centrala a la biodiversitat, exigir la qualitat de l’aiga e de l’aire, promòver una agricultura biologica e paisana per un minjar sanitós.

La logica deu desvolopament rotièr e de l’espandiment urban pòt pas mei durar : volèm un aprofeitament deu territòri que sia juste socialament, damb de mòdes de carreis e un abitat qu’esparnhen l’energia, e qu’empleguen las energias renovelablas per tau de sortir deu nuclear.

Volèm que la santat, l’educacion, la cultura sian preservadas de las logicas deu mercat, e menar per aquò las politicas publicas en partir deus actors deu territòri e de las realitats localas.

Volèm promòver la diversitat culturala e establir, en coërencia damb las autas regions concernidas, una vertadèra politica lingüistica per nòstras duas lengas regionalas, l’occitan e lo basco.

Volèm bastir una politica de cooperacion internacionala que favorisi la justícia e la solidaritat, e desvolopar de navèths escambis privilegiats damb las regions transfrontalièras.

Per aquò aperam las ciutadanas e los ciutadans aquitans, convençuts que las inegalitats socialas e las degradacions ecologicas an una origina comuna, a perlongar la capitada d’Euròpa Ecologia en bastir damb nosaus Euròpa Ecologia Aquitània per portar una lista a las eleccions regionalas de la prima de 2010.

Per nosaus, l’ecologia es amassa, ací e ara ! Ganhem Aquitània a l’Ecologia !

Pour signer l'appel, rendez-vous ici..